Imahe ng Sto. Niño may dugo sa daliri (Sa Tacloban)

TACLOBAN CITY – Makalipas ang isang linggo nang bumisita ang Santo Papa sa Leyte, ang imahe ni Santo Niño na inilagay sa labas ng Balyuan Convention Center sa Siyudad ng Tacloban ay sinasabing nakitang may nabuong tuyong dugo sa dalawang daliri sa kanang kamay.

Una nang nag-imbestiga rito ang Santo Niño Parish at ayon kay Father Oliver Mazo, wala pa silang awtorisasyon para ipahayag ang resulta ng kanilang imbestigasyon.

Dagdag niya, wala kahit sino ang may alam kung sino ang naglagay ng imahe sa nasabing opisina.

Habang ayon sa mga empleyado ng City General Services, sila mismo ay nakasaksi ng naturang pagdurugo sa daliri ng santo.

Samantala, Kinompirma ni Father Amadeo Alvero, social communications director ng Archdiocese of Palo, nagpapatuloy ang imbestigasyon at mayroong nang grupo na nagbeberipika kung ito nga ay himala o gawa lamang ng tao.

Samantala, ipinagdiriwang ang pista ng Santo Niño sa Tacloban City sa Hunyo 30.