Bebot na may sayad nakalusot sa Korea

KALIBO, Aklan – Nakalusot sa mahigpit na pagbabantay ng Philippine National Police (PNP) Aviation Security Group sa Kalibo International Airport (KIA) ang isang babae na sinasabing may diperensiya sa pag-iisip.

Ito’y makaraan makaakyat ng babaeng kinilalang si Leah Castro Reginio, 30, residente ng Brgy. Aureliana, Patnongon, Antique sa eroplanong papuntang Incheon, South Korea, bagama’t walang kaukulang travel documents.

Nalusutan niya ang mahigpit na seguridad, immigration at ground personnel ng airport sa entrance at boarding gates.

Napag-alaman, ang Philippine Airlines direct flight PR 490 mula sa KIA papuntang Incheon, ay umalis dakong 5:34 p.m. sakay ang mga Korean tourist na katatapos lamang magbakasyon sa isla ng Boracay.

Sa inisyal na imbestigasyon ng Civil Aviation Authority of the Philippines (CAAP)-Aklan, nakihalubilo ang babae sa iba pang mga pasahero kaya hindi siya napansin.

Nang lumapag ang eroplano sa Incheon International Airport, nahuli si Reginio ng Korean Immigration airport authorities at nang walang maipakitang passport, ticket, boarding pass at iba pang dokumento ay agad pinabalik sa Kalibo International Airport sakay ng PAL flight PR 489.

Si Reginio ay ligtas na naibalik sa kanyang pamilya.