BBL maaaring ‘di maipasa

AMINADO ang liderato ng Senado na nangangamba silang hindi maipasa ang isinusulong na Bangsamoro Basic Law (BBL) bunsod nang nangyaring sagupaan ng pulisya at Moro Islamic Liberation Front (MILF) na ikinamatay ng mahigit sa 40 Special Action Force (SAF) sa lalawigan ng Maguindanao.

Ayon kay Senate President Franklin Drilon, posibleng marami ang magiging emosyonal sa masaklap na sinapit ng mga miyembro ng SAF sa kamay ng MILF at magiging hadlang sa pagsasabatas ng BBL.

Gayonman, ani Drilon, sa kabila ng insidente ay sisikapin pa rin ng Senado na maipasa ang panukala sa Marso.

Binigyang-diin ng pangulo ng Senado, kung hindi maipasa ang BBL ay mangyayari muli ang mga kaguluhan sa Mindanao at mismong mga residente ang maapektohan ng patuloy na kaguluhan.

Magugunitang sinuspinde na rin ni Senate local government committee chairman Sen. Bongbong Marcos ang mga pagdinig sa BBL hangga’t hindi nabibigyang linaw ang pagkapaslang sa mga miyembro ng SAF.

Dalawang senador na ang bumawi ng kanilang co-sponsorship sa BBL na kinabibilangan nina Sen. Alan Peter Cayetano at Sen. JV Ejercito.

Dalawang resolusyon na rin ang inihain sa kapulungan para imbestigahan ang Mamasapano encounter at itinakda ang Pebrero 4 ang unang pagdinig.

Niño Aclan