Bumugbog kay Vhong arestado

ARESTADO ng mga operatiba ng National Bureau of Investigation (NBI) ang isa sa mga akusado sa pananakit sa TV host at actor na si Vhong Navarro, kamakalawa ng gabi sa Makati City.

Inaresto si Ferdinand Guerrero sa bisa ng warrant of arrest na inisyu ng Taguig City Regional Trial Court dahil sa kasong grave coercion at serious illegal detention.

Kinompirma ni NBI Regional Anti-Illegal Drugs Division chief, Atty. Eric Isidoro ang pag-aresto kay Guerrero.

Si Guererro ay nadakip ng mga tauhan ng NBI sa condominium sa Ayala Avenue, Makati City, Linggo ng gabi.

Hinhintayin pa ng NBI ang magiging desisyon ng korte kung mananatili sa kanilang kustodiya o ililipat ng kulungan si Guerrero.

Sinasabing kasama si Guerrero ng grupo ng negosyanteng si Cedric Lee at modelong Deniece Cornejo na nanakit kay Navarro noong Enero 22, 2014 sa isang condominium sa Bonifacio Global City, Taguig City.

Jaja Garcia