4 tulak tiklo sa drug bust

APAT na tulak ang nasakote  ng mga tauhan ng Northern Police District Anti-Illegal Drug Special Operation Task Group (NPD-AID-SOTG) sa dalawang magkasunod na drug bust kamakalawa ng gabi sa Maynila at Caloocan City.

Sa ulat ni Chief Insp. Arnulfo Ibanez, hepe ng AID-SOTG, kinilala ang mga suspek na sina Jalani Macaorao, 22, Saripoden Dipatuan, 31, kapwa residente ng Brgy. 648, C. Palanca St., San Miguel, Quiapo Manila; Jaime De Ocampo, Jr., 43, at Allan Trinidad, 38, ng  Phase 7, Block 22, Brgy. 186, Bagong Silang, Caloocan City.

Nabatid na sina Macaorao at  Dipatuan  ay naaresto dakong  5:45 p.m. sa Tolentino St., Legarda, Manila makaraan magbenta ng sampung sachet ng shabu na nagkakahalaga ng P50,000 sa isang pulis na nagpanggap na buyer.

Sinabi ni NPD Director Chief Supt. Jonathan Ferdinand Miano, ang mga suspek ay inaresto sa tuloy-tuloy na operasyon laban sa mga nagtutulak ng droga.

Dakong 6 p.m. nang maaktuhan sina De Ocampo at Trinidad  sa isang pot session sa loob ng bahay sa Phase 7, Block 22, Lot 8, Brgy. 186.

Sampung piraso ng sachet ng shabu at mga paraphernalia sa paggamit nito ang nakompiska sa mga suspek na nakatakdang sampahan ng kasong paglabag sa R.A. 9165 (Comprehensive Dangerous Drug Act of 2002) sa  Caloocan City Prosecutors Office.

Rommel Sales