Manilyn, pursigidong magbawas ng timbang

ni Rommel Placente

ANG New Years Resolution pala ni Manilyn Reynes ay ang magpapayat. Alam daw niya na mahirap gawin ‘yun pero susubukan at gagawin daw niya ang lahat para maging slim siya.

Sana nga magawang pumayat ulit ni Manilyn dahil hindi na siya magandang tingnan sa screen, sa totoo. Pero nakatulong naman ang pagiging mataba niya para magkaroon siya ng maraming project. Dahil nga sa pagiging mataba niya, kinuha na siya sa mga comedy role, nakilala na siya ngayon bilang isang komedyana, ‘di ba?

Si Sharaon Cuneta, balita namin hanggang ngayon ay mataba pa rin, na naging dahilan para hindi siya dumalo sa kasal nina Dingdong Dantes at Marian Rivera na ginanap noong December 30 ng nakaraang taon.

Hirap talaga siyang magpapayat. Si Manilyn kaya, makaya nga kaya niyang magbawas ng timbang? At kung pumayat na siya, marami pa rin kayang project ang dumating sa kanya? Baka hindi na siya kunin sa mga comedy show ng GMA 7, ‘di ba? At baka hindi rin naman siya ilagay sa mga serye dahil maraming dramatic actress ang Kapuso Network.

Si Manilyn naman ay hindi nakilala bilang dramatic actress although mahusay din naman siya sa drama.