6-anyos paslit nalunod sa creek (Naghahanap ng gagamba)

NAGA CITY – Patay na nang matagpuan ang isang bata sa bayan ng Nabua makaraan malunod sa isang creek kamakalawa.

Ayon kay Virginia Rejaldo, lola ng biktimang si John Joven Abayon, 6, grade 1 pupil sa Nabua Central School, nahulog ang biktima sa isang creek sa Brgy. San Miguel.

Ayon kay Rejaldo, kasamang naghahanap ng gagamba ng biktima ang 5-anyos niyang kapatid.

Ngunit habang inaabot ang gagamba sa puno ay nahulog ang biktima sa Cagas Creek na naging dahilan ng kanyang pagkalunod.

Dahil sa takot ng nakababatang kapatid ay hindi agad niya nasabi sa kanyang mga magulang ang nangyari sa kanyang kuya kung kaya lumipas pa ang magdamag bago nakuha ang bangkay ng biktima ilang kilometro mula sa lugar kung saan siya nahulog.

Ani Rejaldo, ilang araw bago ang insidente ay tila may premonition ang bata dahil nagtanong sa kanya kung pwede bang tumira sa langit.