HATAW! D'yaryo ng Bayan hatawtabloid.com
ni Roldan Castro
TUMAAS ang level ni Jennylyn Mercado sa pagiging Best Actress at pagpalo sa top 4 sa takilya ng English Only Please ng Metro Manila Film Festival. Pressure sa kanya dahil sa susunod na project ay dapat malampasan pa nila ito.
Hindi ba siya na-surprise na ang Best Actress award niya ay galing sa isang romcom at hindi sa mga drama na pinaggagawa niya?
“Sabi ko nga..nag-usap nga kami ng nanay ko, sabi ko Ma, napansin ko lang parang ang dami ko nang dramang ginawa sa 10 taon ko sa showbiz, first time kong mag-comedy ngayon pa ako nanalo ng acting award. Sabi ko, baka rito ako nakalinya, ha!ha!ha!,” deklara niya.
Kinukulit din siya kung ano ang ibinulong sa kanya ng dating Pangulo/Mayor Joseph Estradasa stage habang ginaganap ang Gabi ng Parangal ng MMFF.
“Hindi ko siya puwedeng sabihin ..baka ..basta iba eh,” natatawa niyang pahayag.
Bastos ba?
“Hindi,” pakli ng dalaga.
Bagamat hindi namamatay ang pagkaka-link niya kay Dennis Trillo, posible kayang magkaroon ng second chance ang pagkakaugnay niya kay Raymart Santiago? Hindi kaya nadugtungan?
“Hindi ah! Kayo talaga. Wala. Lahat na lang?” reaksiyon niya.
Nagpaparamdam ba si Raymart?
“Hindi po. Pero tingin ko sa kanya, hindi siya tumatanda, eh. Baby face pa rin ganoon. Batak pa rin ‘yung katawan. Inaalagaan niya talaga ‘yung sarili niya. Off cam, sobrang kulit niyan. Pupuntahan lang niya ako sa tent, guguluhin lang ako. Nanggugulo lang,nangunguha ng pagkain, ganoon,” sagot niya.
Kumusta si Raymart?
“Okey naman po. Masayahin siya. Sa buong taping namin, masaya,” aniya pa.
Sabi ni Raymart, hindi ka pa raw ready magmahal ulit?
“Hindi ko pa alam schedule ko, eh.ha!ha!ha! ini-schedule ko para… darating din ‘yun, ‘wag magmadali. Balitaan ko kayo kung ano ang update. Sa ngayon, wala talaga, boring, eh!” sey pa niya.
Ayaw pa bang sundan si Jazz?
“Huwag muna. Pinaghirapan ko ito eh (seksing pangangatawan),” tugon niya.
Hindi ba siya naniniwala sa pagbibigay ng second chance sa ex niya?
“Depende po eh, iba-iba.. case to case basis. Sa ngayon, hindi ko pa alam,” aniya.
So, magkaka-level lang sina Mark Herras, Dennis Trillo, Patrick Garcia?
“’Di ba sila-sila dumadalaw. Okey na kami, ganyan. Kasi mas maganda ‘yung kaibigan sila, ‘di ba?”
Pero nilinaw niya na hindi pa nakakadalaw si Dennis sa bahay niya. Itinanggi rin niya ang isyung dumadalaw siya sa condo ni Dennis.
“Parang ‘yung balita noong nakaraang Linggo, nagpunta raw ako ng Boracay, may kasama raw ako, ‘di ba? Saan naman nanggaling ‘yan? Sandali, parang sabay-sabay? Puwede isa-isa? Ha!ha!ha!,” bulalas niya.
Kung saan-saan ka napagkikita ha?
“Oo nga, may Boracay…”
Hindi ba siya affected sa ganoon?
“Hindi kasi hindi naman totoo. Kumbaga, ako medyo affected ako roon sa mga hindi totoo pero tinatawanan ko na lang. Parang ayaw ko nang mag-aksaya ng panahon pero naiinis ako kasi hindi naman totoo. ‘Yun bang bakit ninyo ipinagpipilitan, ‘yung ganoong pakiramdam. Pero sa sobrang gusto ko na lang deadmahin, pinagtatawanan ko na lang. Ayaw ko na lang pagtuunan ng pansin kahit naiinis ako,” deklara pa niya.
Mapapanood si Jennylyn sa kanyang Valentine’s concert sa Skydome , SM North Edsa sa February 13 na guest si Derek Ramsay.
