9 areas firearms free zone — PNP

MAHIGIT na ipagbabawal ng pamunuan ng pambansang pulisya ang pagdadala ng armas sa mga lugar na tutunguhin ni Pope Francis para sa kanyang limang araw na Apostolic and Pastoral visit sa bansa.

Ito’y bilang dagdag na hakbang ng PNP upang matiyak ang kapayapaan at kaligtasan ng nasabing national event.

Ayon kay PNP OIC chief, Police Deputy Director General Leonardo Espina, layon ng pagdeklara ng Firearms Free Zones sa mga lugar na pupuntahan ni Pope Francis kasama rito ang mga ruta na dadaanan ng Santo Papa, ay para matiyak ang kaligtasan ng pinakamataas na lider ng Simbahang Katolika at maging ng publiko.

Kabilang sa mga lugar na idineklarang Firearms Free Zone ay ang mga sumusunod: Nunciature Area, Taft Avenue, Manila;

Malacañang Palace; Manila Cathedral; SM Arena, Mall of Asia; Villamor Airbase, Pasay City; University of Santo Tomas;  Quirino Grandstand; Tacloban City; at Palo, Leyte.

Nagpalabas kahapon ng memorandum si Espina sa regional police directors ng National Capital Region Police Office (NCRPO) at Eastern Visayas hinggil sa kanyang direktiba kaugnay sa mahigpit na pagpapatupad sa RA 10591 o Comprehensive Firearms and Ammunition Law.

Mahigpit din ang bilin ni Espina sa mga opisyal ng PNP, hulihin at arestuhin ang sino mang magdadala ng armas sa loob ng simbahan, sa public drinking and amusement places, mga commercial at public establishments.

Sinabi ng heneral na mahigpit ding ipinagbabawal ang pag-display ng mga armas, sakop dito ang lahat ng gunholders kabilang ang mga miyembro ng PNP,AFP at ibang miyembro ng Law enfocement agencies na naka-civilian attire.

Una nang inihayag ng PNP na kanilang sususpendihin pansamantala ang Permit to Carry Firearms Outside of Residence (PTCFOR).