Maja, talent manager na rin

NAKATSIKAHAN namin kamakailan si Maja Salvador habang nagpi-pictorial ng iniendoso niyang Sisters sanitary napkin.

Panay ang banggit ni Maja ng ‘second chance’ ‘yun pala may ibig sabihin siya, dahil kinuha siya muli ng Megasoft Hygienic products (Super Twins baby dry, Cherub Disney baby colognes, Grand Adult Diapers, Lampein baby comfort) na pag-aari nina Mr. Emilio at Mrs. Aileen Go.

“Kaya nga second chance, bakit tatanggihan ang grasya, ‘di ba?” say ng aktres.

Pinalitan ni Maja si Erich Gonzales pero isang taon palang ang nakalipas ay muling ibinalik ang aktres.

Samantala, planong maging talent manager yata ni Maja dahil ang mga kapatid daw niya ay dinala niya sa ABS-CBN.

“Dinala ko ‘yung tatlo kong kapatid na babae, iprinesent ko kina Mr. M (Johnny Manahan), Ma’am Charo (Santos-Concio), Ma’am Malou (Santos), kasi naghahanap sila ng bagong mukha, eh, parang may hinahanap sila that time. So thank you girls mga kapatid ko.

“Tapos biglang tinanong ni Mr. M ulit ‘tong kapatid ko, sumunod sa akin, hayun, interesado raw sila, eh, ipagpapa-alam ko pa kay boss Vic (del Rosario) kasi Viva naman talaga kami, roon kami ihinabilin ng tatay ko. Kaya mag-uusap pa sila ng handler ko kung paano at sino ang magma-manage,” pahayag ng aktres.

Isa pang tinanong namin kay Maja ay ang tungkol sa seryeng Bridges kasama sinaJericho Rosales at Xian Lim na nitong Disyembre ay nabalitang umatras na ang huli dahil may gagawin siyang serye kasama si Kim Chiu.

Pero napangiti lang ang aktres at sinabi niyang mas magandang sa taga-production kami magtanong.

Sabi namin na si Paulo Avelino na pala ang kapalit ni Xian, ”hindi ko po alam,” mabilis na sagot ng aktres.

Hindi naman itinanggi ni Maja na nanghinayang siya sa pagkawala ni Xian, ”opo naman. Kasi, ang ganda ng workshop namin. ‘Kala ko, noong nagsama kami sa ‘Ina, Kapatid, Anak’, kilala ko na ‘yung Xian na nakilala ko. Eto, noong nag-workshop kami, nakitaan ko siya ng ibang side naman,” kuwento ng aktres.

ni Reggee Bonoan