Holdaper na lumaslas sa dila ng med stude arestado

NAARESTO na ang suspek sa pagholdap at paglaslas sa dila ng biktimang medical student sa Valenzuela City nitong Miyerkoles.

Bago mag-10 p.m. kamakalawa nahuli ang suspek na si Raymond Cabuhat, 30, habang nagsusugal sa Potrero, Malabon.

Ito’y makaraan makunan ng closed circuit television (CCTV) ang suspek at tumugma sa sketch ng pulisya.

Sa presinto, positibo rin itinuro ng biktima si Cabuhat na siyang homoldap sa kanya sa F. Bautista Street sa Marulas, Valenzuela.

Aminado ang suspek na siya ang nangholdap sa biktima ngunit ayon kay Sr. Supt. Roderick Armamento, hepe ng Valenzuela Police, panay ang tanggi ng salarin na sinadya niyang tangkaing putulan ng dila ang estudyante nang sumigaw.

Sasampahan ng kasong robbery with physical injury ang suspek.

Rommel Sales