Back pack bawal sa papal visit

MAHIGPIT na ipagbabawal ang pagdadala ng back pack, iba pang klase ng bag at payong sa mga dadalo sa gagawing misa ni Pope Francis sa Quirino grandstand sa Luneta sa Enero 18.

Isa ito sa mga napagkasunduan sa pulong pangseguridad sa Palasyo na pinamunuan ni Pangulong Benigno Aquino III kahapon ng umaga.

Sinabi ni Communications Secretary Herminio Coloma Jr., bagama’t bukas sa lahat ang misa, kailangang transparent plastic bag ang dadalhin ng mga tao.

Nanawagan ang Malacanang sa publiko na sundin ang patakaran, lalo na ang mga magdadala ng kanilang pagkain o mahahalagang gamit dahil para ito sa seguridad hindi lamang ng Santo Papa, kundi ng milyon-milyong katao na dadalo sa misa.

Ipalalabas din aniya ng Metro Manila Development Authority (MMDA) ang drop-off points para sa dadalo sa misa.

Patuloy aniyang pinag-aaralan ang mga paghahanda sa pinakamahalagang okasyon ngayong 2015 upang hindi magkaproblema.

Ikinokonsidera rin aniya ang lahat ng sitwasyon upang mabuo ang paglalatag ng seguridad sa mga araw na nasa bansa ang Santo Papa .

Ano mang pagbabago ng ipatutupad sa seguridad ay agad na ipaaalam ng pamahalaan para sa kabatiran ng lahat.

Rose Novenario