US drone dapat suriin ng Pinoy experts — Solon (Kung spy o target)

HINDI dapat i-turn over ng Filipinas sa Estados Unidos ang US drone na natagpuan sa lalawigan ng Quezon kamakailan.

Ayon kay House committee on national defense and security chairman Rodolfo Biazon, nananatili ang kanilang pangamba na nag-eespiya ang Amerika sa Filipinas.

Sinabi ni Biazon, dapat dalhin ang US drone sa kampo Aguinaldo at ipaeksamin sa Filipino experts upang tukuyin kung spy o target drone ito.

Kung target drone lamang ito ay walang dapat ipangamba dahil hindi ito panganib sa seguridad ng bansa.

Ngunit kung makikitang may audio at visual surveillance component ito tulad ng spy drone, kakailanganin pa nang mas masusing eksaminasyon at pag-aaral dito.

Iginiit ni Biazon na kung spy drone ito ay dapat na magpaliwanag ang US kung ano ang layunin sa pag-deploy nito sa bansa at kung aprubado ba ito ng security agencies ng Filipinas.