Paulo, pinalitan si Xian sa Bridges (Dahil sa mga ‘di kinayang eksena ng aktor)

KOMPIRMADONG si Paulo Avelino na ang kapalit ni Xian Lim sa Bridges.

Base sa tsika sa amin ng taga-ABS-CBN ay nag-uusap daw sina Ms Malou Santos at Dreamscape unit head, Deo T. Endrinal tungkol kay Paulo kasi nga may kasunod palang project ang aktor pagkatapos ng Exchange Gift episode nila ni KC Concepcion na nag-umpisang mapanood kahapon bago mag-Showtime.

Matatandaang kay John Lloyd Cruz unang inialok ang papel bago napunta kay Xian na bandang huli ay umatras na ang aktor dahil hindi na raw nito kinaya ang mabibigat na eksena.

Nahiya na raw si Xian sa mga kasama niya sa serye dahil nga nagiging cause of delay daw siya sa tapings sa kauulit-ulit ng mga eksena. ‘Di ba nga may tsikang inaabot daw ng 32 takes na itinanggi naman din ng kampo ng aktor.

Ang kaso, maraming nagpapatunay nito na taga-production bukod pa sa naikuwento rin ito ng ilang cast na kasama sa Bridges sa ibang kaibigang artista na naikuwento naman sa mga kaibigan nilang reporters.

Hayun, nagpasalin-salin na ang kuwento kaya kumalat ang tsikang umatras si Xian.

Pagtatanggol naman ng KimXi fans ay, “hindi po siya umatras, pinul-out siya kasi may project sila ni Kim (Chiu), gagawa po sila ng soap.”

At in fairness, totoo nga na may project ang dalawa base sa sabi sa amin ng taga-ABS-CBN, “may next movie pa nga sanang gagawin sina Xian at Kim, naka-hold lang dahil gagawa sila ng soap.”

Ano ba ang kuwento ng Bridges na ‘yan at nahirapan si Xian sa mga eksena?

ni Reggee Bonoan