Mga maikling-maikling kwento: Maganda At Seksi Kasi…

Nakatabi ni Josh sa pangdalawahang upuan ng ordinaryong bus ang isang coed. Nilipad-lipad ng hangin ang mahabang buhok nito. Sumagi-sagi iyon sa kanyang mukha.

“Miss, ‘yang buhok mo…” ang paninita niya sa estudyante.

Gayong kasuplado si Josh sa pagbibinata pagdating sa mga kababaihan kapag ‘di pasado sa kanya ang itsura. Pero ‘pag maganda ay napaka-gentleman niya.

“Miss, gusto mong isara natin ‘yang bintana (ng bus) para ‘di magulo ang buhok mo?” ngiti niya sa chikababes.

“Sige, please…” ang ganting ngiti nito sa kanya.

Isang umaga, sakay ng kabibili-bili lang na mountain bike ay nag-ikot-ikot si Josh sa parke ng kanilang barangay. Tumigil siya sa karamihan ng mga kabataang babae na nagpapalipas-oras doon. Ipinagyabang niya ang ilan sa mga daring stunts sa pagba-bike.

Buong giliw siyang pinalakpakan ng isang maganda at seksing chikabaes.

“Ang galing-galing mo…” anito nang lapitan siya.

“Thanks, Sexy…” pagliliyad-dibdib niya.

“Kaya ko rin ‘yung mga ginawa mo ka-nina, pogi,” pagpapakita ni Sexy ng mapuputing ngipin sa pagngiti.

“Ow, talaga? Sige nga…”

Gamit ang bike ni Josh, tila nakipag-showdown sa kanya si Sexy sa pagpapakita ng mga daring stunts sa pagba-bike.

Humanga siya sa husay at lakas ng loob ni Sexy.

“Teka, pogi… ilang minuto ang naku-kunsumo mo sa isang paspas na pag-ikot sa parkeng ito?” tanong ni Sexy sa kanya.

“Tatlong minuto lang…” pagmamalaki niya.

“Sa akin, baka wala pang dalawang minuto, e…” agap ni Sexy.

Malakas na napa-”ow?!” si Pogi.

“’Pag nabigo akong ma-break ang record mo, may premyo kang kiss sa akin…” ang tawa ni Sexy. Kung saka-sakali ay makahahalik nang libre si Josh sa malalambot na labi ng chi-kababes. Napa-oo agad siya ni Sexy. Sinakyan nito ang kanyang mountain bike. At saka ito pumaspas ng padyak sa pedal niyon.

Inorasan niya si Sexy. Hindi ito nakabalik sa loob ng dalawang minuto. Lumampas ang tatlong minuto ay wala pa rin. Lumipas pa ang ilang minuto… Naging isang oras… dalawang oras… tatlong oras…

Napanganga si Josh. Maliwanag pa sa sikat ng araw na itinakbo ni Sexy ang kanyang mountain bike.

Ni REY ATALIA