Most wanted sa Munti arestado

HINDI umubra ang pekeng ID na ginamit ng sinasabing ‘no.1 most wanted criminal’ nang arestuhin ng mga alagad ng batas habang naaktuhang nagsusugal kamakalawa ng gabi sa Muntinlupa City.

Nakakulong na sa Muntinlupa City Police detention cell ang suspek na si Jojo Dereza, nasa hustong gulang, naninirahan sa naturang lungsod.

Base sa report na natanggap ni Muntinlupa City Police Sr. Supt. Noel Nobleza, dakong 6:45 p.m. nang masakote ang naturang suspek sa Batibot Compound, Purok 6, Brgy. Alabang ng naturang siyudad, sa bisa ng warrant of arrest na inisyu ng Muntinlupa City Regional Trial Court dahil sa kasong murder.

Naaresto si Dereza ng mga pulis habang nagsusugal at gumamit ng pekeng ID na ang pangalan ay Jolly Huiden, upang lituhin ang mga huhuli sa kanya.

Ngunit hindi ito umubra sa mga pulis na agad siyang inaresto at dinala sa presinto. Sa record ng pulisya, sinasabing no.1 most wanted criminal sa naturang lungsod ang suspek.

Manny Alcala/Jaja Garcia