Kuya pinatay ni bunso

SAMPALOC, Quezon – Pinagtataga hanggang mapatay ng bunsong kapatid ang kanyang kuya makaraan magtalo sa ‘di malamang dahilan sa Brgy. Ilayang Owain ng bayang ito kamakalawa.

Sa ipinadalang report ng Sampaloc PNP sa Camp Guillermo Nakar sa Lucena City, sa tanggapan ni Senior Supt. Ronaldo Genaro Ylagan, Quezon PNP Provincial Director, kinilala ang biktimang tadtad ng taga sa iba’t ibang bahagi ng katawan na si German Gagan Flores, 48, pansamantalang nakatira sa nasabing lugar.

Habang agad naaresto ng mga pulis ang suspek na si William Gagan Flores Jr., 42, residente rin sa nabanggit na lugar.

Sa inisyal na imbestigasyon, dakong 4:30 a.m., habang armado ng bolo ay galit na pinuntahan ng suspek ang bahay ng nakatatandang kapatid.

Nang madatnang natutulog ang biktima ay agad siyang pinagtataga ng suspek hanggang malagutan ng hininga at pagkaraan ay mabilis na tumakas.

Ngunit naaresto ang suspek sa follow-up operation ng mga awtoridad.

Raffy Sarnate