Bebot nalasog sa flyover

NAGULUNGAN at nasagasaan ng iba’t ibang uri ng mga sasakyan hanggang sa magkalasog-lasog ang katawan ng isang hindi nakilalang babae sa isang flyover sa Pasay City kahapon ng madaling araw.

Halos hindi na makilala ng mga awtoridad ang bangkay ng biktima dahil nagkahiwalay-hiwalay ang katawan at bukod sa nasagasaan ng iba’t ibang uri ng mga sasakyan, posibleng nagulungan din siya ng isang 10 wheeler truck dahil sa ebidensiyang nakita sa bangkay.

Base sa inisyal na imbestigasyon ni PO3 Edmar Echate, ng Traffic Accident Investigation Unit (TAIU) ng Pasay City Police, dakong 4 a.m. nang matagpuan ang lasog-lasog na katawan ng biktima sa South bound lane ng flyover ng Roxas Boulevard ng siyudad.

Ayon sa nakalap na impormasyon ng pulisya sa basurerong si Crispin Casero, 30, dakong 3 a.m. habang siya ay nangangalakal sa naturang lugar, narinig niya ang kalabog na parang may nabangga ang isang sasakyan.

Nakarating agad ang mga awtoridad sa insidente at nang kanilang puntahan ay natagpuan nila ang lasog-lasog na katawan ng biktima.

Jaja Garcia