Mag-ama sugatan sa sunog dahil sa paputok

LAOAG CITY – Nasugatan ang mag-ama makaraan aksidenteng pumutok ang nakaimbak na mga paputok sa loob ng kanilang inuupahang bahay sa Brgy. San Pedro, Bacarra, Ilocos Norte kamakalawa.

Bukod sa pagkasugat ng mag-amang si Noli Galang, negosyante mula sa Pampanga, at kanyang anak na si Nolimar ay nasunog ang ilang bahagi ng bahay at ilan ding appliances tulad ng television set, computer set, radyo at iba pang kagamitan.

Ayon kay Noli Galang, habang ginagamit ng kanyang anak na si Nolimar ang mosquito bug zapper nang bigla na lamang mag-spark kasunod ang malakas na pagputok mula sa pinag-imbakan ng mga paputok.

Sinabi ni Galang, magmula nang maging negosyante siya ng paputok noon pang 1976 ay ngayon pa lamang siya nakaranas ng aksidente sa paputok.

Dahil sa lakas ng pagsabog ay lumipad ang tatlong yero ng kanilang inuupahang bahay.

Patuloy ang imbestigasyon ng Bureau of Fire Protection sa insidente.