GMA pinayagan mag-Pasko sa bahay

MAIPAGDIRIWANG ni dating dating Pangulo at ngayo’y Pampanga Rep. Gloria Macapagal-Arroyo ang Pasko sa kanilang bahay.

Ito’y makaraan pagbigyan ng Sandiganbayan First Division ang hirit niyang holiday furlough.

Ngunit sa desisyon ng anti-graft court, maaari lamang makauwi sa bahay sa La Vista, Quezon City si Arroyo mula ngayong araw, Disyembre 23 hanggang 26, hindi hanggang Enero 3 na hiniling niya. Ibig sabihin, sa Veterans Memorial Medical Center (VMMC) pa rin sasalubungin ng dating pangulo ang Bagong Taon.

Dakong 10 a.m. ng Disyembre 23 nakatakdang ibiyahe si Arroyo patungo sa La Vista, at kailangang bumalik ng ospital, ng 2 p.m. ng Disyembre 26.

Inatasan ng korte ang Philippine National Police (PNP) na magbigay-seguridad sa dating pangulo, ngunit sasagutin ni Arroyo ang lahat ng gastos.

Kontrolado ng mga awtoridad ang paggamit niya ng communication at electronic devices at bawal siyang magpaunlak ng panayam sa media.

Naka-hospital arrest si Arroyo dahil sa kasong plunder kaugnay ng sinasabing maanomalyang paggamit sa pondo ng Philippine Charity Sweepstakes Office (PCSO).