Bangkay ng bebot lumutang sa Tullahan River

LUMULOBO na ang bangkay at walang saplot na pang-ibaba ang isang babae nang matagpuang nakalutang sa Tullahan river kamakalawa ng hapon sa Valenzuela City.

Inilarawan ng pulisya ang biktimang hindi pa natutukoy ang pagkakakilanlan, na may gulang 24 hanggang 28-anyos, may tattoo na paro-paro sa braso at Sam sa binti.

Patuloy na inaalam ng mga awtoridad ang pagkakakilanlan ng sinasabing lalaking nakitang nakahubad sa pinangyarihan ng insidente upang mabatid kung may kinalaman siya sa insidente.

Base sa nakalap na impormasyon mula kay Sr. Supt. Rhoderick Armamento, hepe ng Valenzuela City Police, pasado 1 p.m. kamakalawa nang makita ang bangkay ng biktima na palutang-lutang sa Tullahan River sa Brgy. Marulas ng naturang lungsod, at nabatid na may mga saksak sa dibdib at braso.

Ayon sa isang residente na tumangging magpabanggit ng pangalan, kamakalawa dakong 1:30 a.m. nang may maispatan siyang malaking lalaking nakahubad malapit sa pader sa tabi ng ilog na kumuha ng dahon ng saging at tinakpan ang harapan.

Ilang sandali lamang ang nakalipas ay nakarinig sila ng sigaw ng isang babae na humihingi ng tulong ngunit sa pag-aakalang malayo ito ay hindi pinansin ng mga residente hanggang makita nilang may mga pulis na dumating.

Nang suriin ang bangkay, nakita sa ilalim ng bra ng babae ang aluminum foil na ginagamit sa pagsinghot ng shabu.

Dinala na sa crime laboratory ang bangkay upang mabatid kung ginahasa bago pinatay ang biktima ng salarin.

Rommel Sales