HATAW! D'yaryo ng Bayan hatawtabloid.com
ILANG mga dating kasamahan ni Avelino “Samboy” Lim sa PBA ang nagpaplanong magtayo ng isang exhibition na laro para tulungan sa paglikom ng pera para sa pagpapaospital niya.
Ito’y kinompirma ni Purefoods Star team manager Alvin Patrimonio habang unti-unting inaayos ang paglilipat ni Lim mula sa intensive care unit ng Medical City Hospital sa Ortigas sa isang regular na kuwarto.
Matatandaan na biglang hinimatay si Lim habang nagpahinga sa bench sa isang laro noong Nobyembre 28 sa Ynares Sports Arena sa Pasig City.
Ayon sa mga medical tests, aktibo pa rin ang utak ni Lim at umikot naman ang kanyang mata kahit naka-comatose pa siya.
Bukod pa rito ay humihikab pa rin si Lim at gumagana pa rin ang kanyang mga vital organs, bukod sa pagiging stable ang kanyang blood pressure.
Sa tulong ng mga dating PBA superstars tulad nina Ramon Fernandez at Allan Caidic, ibinuksan na ng pamilya ni Lim ang isang account sa Banco de Oro kung saan puwedeng mag-deposito ang mga tagahanga at kaibigan niya ng mga donasyon para tumulong sa panggastos ng pagpapaospital niya.
Pati ang PBA Commissioner’s Office ay tumutulong kay Lim, ayon kay Media Bureau Chief Willie Marcial.
Nag-donate din si Asi Taulava ng NLEX ng P10,000 sa pamilya ni Lim.
(James Ty III)
