HATAW! D'yaryo ng Bayan hatawtabloid.com
KAPWA namatay ang mag-utol matapos bumangga sa kasalubong na pampasaherong jeep ang kanilang sinasakyang motorsiklo nang ma-overtake sa isang bus sa Caloocan City kahapon ng madaling araw.
Dead-on-the-spot ang mga biktimang sina Orwin Apin, 30-anyos at nakababatang kapatid na si Oscar Apin Jr., 29, kapwa residente sa Alibangbang St., Pangarap Village, ng nasabing lungsod sanhi ng mga pinsala sa ulo at katawan.
Batay sa ulat ni SP02 Edgar Quintos, may hawak ng kaso, dakong 12:35 ng madaling araw nang maganap ang insidente sa kahabaan ng Quirino Highway, Brgy. 183 ng nasabing lungsod.
Sakay ang magkapatid ng Honda motorcycle (1468-TL) na minamaneho ni Orwin at binabagtas ang Quirino Highway ngunit pagsapit sa tapat ng Better Living Tiles and Bath Center sa naturang lugar ay nag-overtake ang mga biktima sa pampasaherong Cem Transit bus pero bumulaga sa kanila ang pampasaherong jeep na hindi nila naiwasang salpukin.
Tumilapon ang mga biktima nang halos 20 metro ang layo bago bumagsak sa sementadong kalsada na naging dahilan ng agarang kamatayan ng magkapatid.
Mabilis namang sumibad patungong San Jose Del Monte, Bulacan ang hindi nakikilalang driver ng pampasaherong jeep na hindi nakuha ang plaka.
Rommel Sales
