Chinese trader dinukot sa Batangas

NAGA CITY-Nakaalerto ang buong PNP sa lalawigan ng Quezon makaraan marekober sa bayan ng Tiaong ang sasakyan ng dinukot na negosyanteng Chinese sa lalawigan ng Batangas.

Sa ulat ni Chief Insp. Francis Pasno, Deputy Chief of Police ng PNP-Tiaong, pasado 10 a.m. kamakalawa nang dukutin ang negosyanteng si Jefferson Ty.

Lulan ang biktima ng kanyang asul na Nissan Frontier Navara (NQD-689) sa bayan ng Padre Garcia patungo sana sa kanyang pag-aaring farm nang dukutin ng hindi nakikilalang mga salarin.

Pasado 12:45 a.m. kamakalawa nang makita ng isang barangay kagawad sa Brgy. San Agustin, sa bayan ng Tiaong ang sasakyan ng biktima na umaandar pa ang makina.

Agad nakarating sa mga pulis ang pangyayari at sa kanilang pagresponde ay nakompirmang pag-aari ng biktima ang sasakyan.

Ayon kay Pasno, posibleng nanlaban sa mga salarin ang biktima dahil may bakas ng dugo sa loob ng sasakyan at nakakalat din ang kanyang mga gamit.