P.2-M ng Koreano tinangay ng 8 towing personnel

INIREKLAMO ng isang Korean national  sa Manila Police – General Assignment and Investigation Section (MPD-GAIS), ang walong towing personnel ng Manila Traffic and Parking Bureau (MTPB) dahil sa pagkawala ng P250,000 sa loob ng sports utility vehicle (SUV) na hinila ng grupo habang nakaparada sa Mabini St., Malate, Maynila.

Ayon kay C/Insp. Arsenio Riparip, naganap ang insidente nitong Disyembre 11, dakong 3:10 p.m. habang nagpapapalit ng pera sa Edzen Money Changer sa Mabini St., ang biktimang si Minjin Park, 38, ng 27 Cesma St., Concorde Village, Tambo, Parañaque.

Inabutan ng biktima sina Rodrigo Villena; Elson Minador, 21; Christopher Boradi, 25; Arnel Neves, 24; Lyci Ico, 20; David John Calixto,18; Roy Reyes, 24; at isa pang hindi nakikilalang towing personnel habang hinihila ang kanyang sasakyan.

Sinabi ng biktima, nasa loob ng kanyang sasakyan ang isang bag na naglalaman ng P250,000 na kanyang ipinapalit na pera ngunit nawawala na ito.

Gayonman, itinanggi ng towing personnel ang akusasyon ng biktima.

Hinihintay ng MPD-GAIS, ang kopya ng CCTV na nakakabit sa lugar para makita kung sino ang pumasok sa sasakyan ng biktima.

“Wala namang forcible entry e, malalaman natin sa CCTV record kung sino ang pumasok sa loob ng kanyang sasakyan,” ayon kay SPO2 John Cayetano, imbestigador ng MPD-GAIS.

Samantala, inireklamo rin ng truck driver na si Mauro Montano, ng Watch Cargo Movers, may tanggapan sa 21 Railroad St., Port Area, Maynila, ang walong towing personnel ng MTPB na bumugbog sa kanya makaraan i-tow ang kanyang minamanehong truck  dakong 10:30 p.m. sa harap ng Adamson University.

Aalamin ng MPD-GAIS kung ang inireklamong walong towing personnel ng MTPB ang unang inireklamo ng Korean national.

Leonard Basilio