HATAW! D'yaryo ng Bayan hatawtabloid.com
SUBIC, ZAMBALES—Nanawagan ang isang miyembro ng Barangay Police Special Force na pabilisin ng Department of Interior and Local Government (DILG) ang aksiyon laban sa mga miyembro ng Zambales Police Office na tumambang sa kanya kasama ang buong pamilya sa bayang ito kamakailan.
Sa joint complaints sa National Police Commission (NAPOLCOM) sa Region 3, inakusahan ng mga nagreklamo sa pangunguna ng isang alyas “Don Pobre” na tinambangan siya at ang kanyang buong pamilya ng dalawang opisyal at 31 pang miyembro ng San Antonio at Casillejos, kapwa sa Zambales.
Ayon kay Don Pobre, nagtatrabaho rin bilang police asset laban sa mga kriminal, tinambangan siya kasama ang asawa at dalawang menor de edad na anak ng mga suspek noong umaga ng Abril 25 lulan ng kotseng Kia Pride car sa Govic Highway sa Mangan-Vaca, Subic.
Nakaligtas sa ambush ang pamilya at nakatakas ngunit iginiit ni Don Pobre na nasa ilalim pa rin ng trauma at takot ang kanyang mga anak na edad anim at tatlo dahil sa tangkang pagpatay sa kanila ng mga awtoridad.
Nagsampa si Don Pobre ng mga kasong kriminal at administratibo at nitong Mayo 8 matapos ang masusing pagsisiyasat ay inirekomenda ni NAPOLCOM-R3 evaluator Amado Tilada ang pagsasamapa ng kasong grave misconduct laban sa mga pulis na sangkot sa ambush maliban sa dalawang opisyal ng Subic na kinasuhan ng serious neglect of duty.
Ang rekomendasyop ni Tilada ay inaprubahan ni NAPOLCOM-R3 director Manuel Pontanal ngunit nadesmaya si Don Pobre dahil wala pang aksiyon sa kaso.
“Nakikiusap po kami na sana ay mapakinggan ni DILG Sec. Mar Roxas ang aming kahilingan na pabilisin ang pagbibigay ng hustisya sa aming pamilya na hanggang ngayon ay nakararamdam ng takot para sa aming kaligtasan at nagtatago at walang layang makalabas ng aming tahanan dahil baka maulit na naman ang pag-ambush sa amin,” pagmamakaawa ni Don Pobre na napilitang lumisan ang pamilya sa Mangan-Vaca mula sa tangkang pag-ambush sa kanila ng mga pulis.
HNT
