HATAW! D'yaryo ng Bayan hatawtabloid.com
NAGWAKAS ang maliligayang araw ng isang serial rapist, magnanakaw at karnaper makaraan maaresto sa isang ospital habang nagpapagamot ng sugat sa ulo kamakalawa ng gabi sa Caloocan City.
Arestado habang nilalapatan ng lunas sa Bernardino Hospital ang suspek na si Albert Biol, alyas Daniel Mercado at Mores, 42, residente ng Phase 10-B, Package 6, Block 95, Brgy. 176, Bagong Silang ng nasabing lungsod, nahaharap kasong rape, robbery with homicide at carnapping.
Nauna rito, iniutos ni Caloocan City Mayor Oca Malapitan ang malawakang paghahanap sa serial rapist na si Biol, napag-alamang may pending warrant of arrest sa kasong rape at robbery with homicide.
Dakong 7 p.m. kamakalawa, binaril ng suspek si Benjamin Alhambra, 32, sa Block 10, Bankers Drive, Bankers Village, Brgy. 171 ng lungsod, makaraan holdapin.
Bagama’t sugatan, nakakuha ng matigas na bagay ang biktima at hinampas sa ulo ang suspek.
Bunsod nito, nagtungo ang suspek sa ospital upang ipagamot ang sugat sa ulo na naging dahilan upang siya ay maaresto ng mga awtoridad.
Habang iniimbestigahan, sampung kababaihan ang nagtungo sa himpilan ng pulisya at positibong itinuro si Biol na siyang homoldap at gumahasa sa kanila sa magkakaibang insidente sa lungsod.
Rommel Sales
