Malayo pa sa Done Deal

DONE DEAL na nga ba ang ikinakasang laban nina Manny Pacquiao at Floyd Mayweather Jr?

Whew!   Sa totoo lang, hilong-hilo na ang lahat ng boxing aficionados sa tunay na estado ng ikinakasang laban.

Sa totoo lang, wala pa talagang malinaw na resulta ang pinag-uusapang laban nina Manny at Floyd, pero ang mahalaga, patuloy ang pagpupunyagi ng malalaking tao sa sirkulo ng boksing para maikasa ang nasabing bakbakan.

Kamakailan lang ay naglabasan na sa ilang jaryo na done deal na nga ang nasabing laban.

Pero mukhang malayo pa sa katotohanan iyon.

Sa totoo lang, gusto ni Pacquiao na matuloy ang kanilang laban ni Mayweather.  Hayagan na niyang sinabi iyon pagkatapos na dominahin niya sa laban si Chris Algieri nito lang nakaraang buwan.

Tayong lahat ay gustong mapanood ang labang iyon.   Pero ang malaking tanong ay kakasa ba si Floyd sa hamon?

Aba’y nito lang nakaraang araw ay may panibagong taktika na naman si Mayweather para magulo ang negosasyon ng kani-kanilang kampo.

Sa latest report sa ilang boxing websites, humihingi umano si Floyd ng two-thirds ng magiging revenue sa laban nila ni Pacman.

Mukhang gumagawa na naman si Floyd ng panibagong ploy para maging solidong muli ang kanyang pag-atras sa laban.

Tingin kasi ng maraming kritiko, mukhang mahirap sikmurain ni Pacquiao na itinuturing na isang global icon sa boksing na tanggapin ang nasabing demand ni Mayweather.

Aba’y dasal na lang tayong lahat na nagmamahal sa boksing na sana nga’y matuloy na minimithing laban.   At sana’y matanggal na sa katawan ni Floyd ang pamamalahibo kapag si Pacman na ang pinag-uusapan.   Amen!

Alex Cruz