Technician nag-amok tigok sa parak (Kinulam ng kaanak)

PATAY ang isang 27-anyos technician, pinaniniwalaang kinukulam ng kanyang mga kaanak sa probinsiya, nang barilin ng pulis makaraan manghalihaw ng saksak at tinangkang putulin ang kanyang ari kamakalawa ng hapon sa Sta.Cruz, Maynila.

Sa imbestigasyon ni SPO2 Jonathan Bautista, naganap ang insidente dakong 1 p.m. sa eskinita sa panulukan ng Kusang Loob at Mayhaligue Sts. Sta. Cruz, Maynila.

Tatlong araw pa lamang mula nang dumating ang suspek na si Ricky Buendia, 27, ng 1120 Kusang Loob St., mula sa Cagayan Valley na lalawigan ng kanyang asawa, bago naganap ang insidente.

Ayon sa ina ng suspek na si Gina, sinabi ng kanyang anak ang katagang “Inay, kung may mangyari sa akin, bahala na kayo.”

Sinabi ni Gina na parang sinapian ang kanyang anak o kinulam sa Cagayan dahil talon nang talon at sinasabing “Tama na, tama na, hindi ko na kaya.”

Aniya, ipinagamot nila sa albularyo ang suspek na sinabing nakulam nga ang kanyang anak at ang target ng mangkukulam ay ang ‘ulo sa itaas, at ulo sa ibaba’ ng anak kaya namimilipit sa sakit.

Hanggang sa bigla na lamang, manghalihaw ng saksak ang suspek kaya humingi ng tulong sa mga pulis ang kanyang mga kaanak.

Nakiusap ang mga pulis na bitiwan ng suspek ang kutsilyo ngunit hinalihaw sila ng saksak.

Bunsod nito, pinaputukan ng isa sa mga pulis ang suspek. Bagama’t duguan ay binuksan ng suspek ang zipper ng kanyang pantalon at tangkang putulin ang ari ngunit napigilan ng kaanak.

Tinangka rin laslasin ng suspek ang kanyang leeg ngunit biglang nawalan ng malay at nalagutan ng hininga dahil sa tama ng bala.

Leonard Basilio