Banta ni ER kay PNoy inismol

MINALIIT ng Palasyo ang banta nang napatalsik na si Laguna Gov. ER Ejercito na gusto niyang makitang nakakulong si Pangulong Benigno Aquino III at magbabalik siya sa politika sa 2016.

Ayon kay Communications Secretary Herminio Coloma, Jr., hindi nangangamba ang Malacañang sa ano mang banta dahil ipinaiiral ng administrasyong Aquino ang Saligang Batas at lahat ng mga batas ng bansa.

Iginiit ni Coloma, ang pagpapatalsik kay Ejercito ay desisyon ng Commission on Elections (Comelec), isang independent constitutional body at kinatigan ng Korte Suprema.

Binigyang diin ni Coloma, si Pangulong Aquino at mga miyembro ng gabinete ay naglilingkod ayon sa pagtitiwala ng mga mamamayan at sinusunod ang rule of law.

“Sa parte ng Pangulo at ng mga miyembro ng Gabinete, kami ay naglilingkod ayon sa pagtitiwala ng ating mga mamamayan at sinusunod ang Saligang Batas at lahat ng mga batas ng bansa. Kaya’t hindi naman kami nangangamba sa ano mang banta na katulad ng kanyang sinabi dahil ginagawa namin ang aming tungkulin nang naaayon sa batas at nang buong katapatan sa madlang Filipino,” sabi ni Coloma.

Sa panayam kay Ejercito sa Second Ginto ng Palad for Public Service awarding ceremonies ng Movie Writers’ Welfare Foundation noonga Sabado, ibinulalas nang napatalsik na Laguna governor ang kanyang himutok laban kay Pangulong Aquino na aniya’y pinag-iinitan ang kanilang pamilya.

Si Ejercito’y tinaggal sa pwesto dahil sa labis na paggasta noong 2013 elections.

Rose Novenario