Lakers tinuka ng Timberwolves

TALO na naman.

Ganoon ang bulalas ng mga Los Angeles Lakers fans nang yumuko na naman ang kanilang team sa dehadong Minnesota Timberwolves, 120-119 na ginanap sa Staples Center.

Pinagtulungan nina Mo Williams at Thaddeus Young ang opensa ng Wolves nang tumapos sila ng 25 at 22 puntos ayon sa pagkakasunod. Pero ang tunay na bida sa kanila ay nang umangat ang laro ni Zach LaVine na tumikada ng 28 puntos.

Si LaVine na naglaro ng college basketball sa UCLA (University of California Los Angeles) ay kumana ng 11 of 14 field goals at hindi siya nagmintis sa tres na may 2-for-2.

“I was just in the flow and running the floor hard. when any player feels like it’s going in, the hoop looks big. I was just throwing it up and it was going in,” pahayag ni LaVine.

Hindi naman naging sapat para sa Lakers ang 26 puntos, 5 rebounds, 5 assists at limang steals ni Kobe Bryant nang pumaltos ang huli niyang tira bago tumunog ang final buzzer.

Sa kasalukuyan ay may taglay na 3-13 record ang Lakers at nailista nila ang ikaapat namang sunod na pagkatalo para manatili sa hulihan ng team standings ng Western Conference.

Nag-imprub naman ang Minnesota sa 4-10 at tinuldukan nila ang 3-game na pagsadsad.