Blackwater magkakaroon ng revamp

MALAKING balasahan ang mangyayari sa Blackwater Sports dahil sa bokya nitong kampanya sa PBA Philippine Cup.

Nagbanta ang team owner ng Elite na si Dioceldo Sy na pakakawalan niya ang ilang mga manlalarong hindi nagpakitang-gilas sa torneo.

Idinagdag niya na gagamitin ng coaching staff ng Blackwater ang dalawang huling laro nito sa eliminations kontra Talk n Text at San Miguel Beer bilang mga tryout upang determinahin kung sino ang mananatili sa koponan at sino ang tatanggalin.

“Nabigla kami sa pag-akyat namin sa PBA. Now we have learned and we now know what to do,” wika ni Sy. “Siguro kailangan mas bata. Kailangan we have to look at the team three years from now, we must invest in putting in young legs.”

Isa sa mga inaasahang mananatili sa lineup ng Blackwater para sa PBA Commissioner’s Cup ay ang rookie na si Brian Heruela.

“Brian refuses to lose and I like what I am seeing from him,” ani Sy.

Bukod dito ay si Sy mismo ay tutulong kay coach Leo Isaac sa paghanap ng malaking import para tulungan ang Blackwater na makabawi sa susunod na komperensiya.

(James Ty III)