Kathryn, malulungkot ‘pag nabuwag ang loveteam kay Daniel

ni Roldan Castro

HINDI mapasusubalian na namamayagpag ngayon ang love team nina Daniel Padilla at Kathryn Bernardo kaya binigyan sila ng parangal noong Linggo sa PMPC Star Awards for TV bilang German Moreno’s Power Tandem.

Ayon kay Kathryn, ready naman siya ‘pag dumating ang time na mabubuwag sila. Ang mahalaga ngayon ay ini-enjoy nila ang pagsasama at nabibigyan ng kaligayahan ang fans.

“Wala naman yatang love team na forever kaya kahit ayaw mo na maka-love team na iba o kaya ay hindi ka sanay, eh part talaga ‘yon,” bulalas ni Kath.

Kahit ayaw nilang maghiwalay, hindi naman puwede. Dumarating talaga ‘yung pagkakataon na magsosolo sila at ipa-partner din sa iba.

“Ayaw muna naming isipin kasi nakalulungkot na kasama for almost three years tapos iba bigla ‘yung kasama mo. Ayaw ko namang maging selfish sa kanya, pwede rin siyang i-love team sa iba pero iba lang talaga na comfortable na kayo sa isa’t isa,” dagdag pa ni Kathryn sa isang panayam.