Hapee magsasakripisyo — Roque  

MULING kukulangin ng manlalaro ang Hapee Toothpaste sa labanan nito kontra Cebuana Lhuillier mamaya sa PBA D League Aspirants Cup na gagawin sa Technological University of the Philippines Gym sa P. Casal, Manila.

Hindi lalaro ang ilang mga Fresh Fighters na taga-San Beda College tulad nina Art de la Cruz, Baser Amer at Ola Adeogun dahil nasa Ynares Sports Arena sa Pasig para maglaro sa Red Lions sa Game 1 ng finals ng Philippine Collegiate Champions League mamaya rin kontra De La Salle University.

“Hapee will have to sacrifice playing with a depleted lineup. PCCL is the first priority for the San Beda players,” wika ni Red Lions team manager Jude Roque.

Ilang beses ding naglalagare ang mga manlalaro ng kani-kanilang mga paaralan sa PCCL at sa PBA D League tulad nina Glenn Khobuntin at Troy Rosario ng National University at Mac Belo at Mike Tolomia ng Far Eastern University.

Lalaro na si Rosario para sa Hapee mamaya kasama sina Ray Parks, Kirk Long, Garvo Lanete at Arnold Van Opstal.

(James Ty III)