Finals ng PCCL sisiklab ngayon

MAGSISIMULA mamayang alas-4 ng hapon ang best-of-three finals ng Philippine Collegiate Champions League (PCCL) na paglalabanan ng defending champion De la Salle University at ang kampeon ng NCAA na San Beda College sa Ynares Sports Arena sa Pasig City.

Unang nakapasok ang Green Archers sa finals pagkatapos na walisin nila ang Group A na may apat na sunod na panalo habang nanguna ang Red Lions sa Group B na may tatlong panalo at isang talo kontra La Salle, 61-56.

Pangungunahan nina Jeron Teng at Ben Mbala ang atake ng La Salle samantalang ang San Beda naman ay inaasahang babanderahan nina Ola Adeogun, Art de la Cruz at Baser Amer.

Sa 87-68 panalo ng Red Lions kontra Arellano University noong Martes upang makuha ang puwesto sa finals ay humataw si De la Cruz ng 20 puntos at 10 rebounds samantalang gumawa si Amer ng 16 puntos at anim na assists.

“Sabog ang opensa namin against La Salle. Na-outplay ni Mbala si Ola,” wika ni interim SBC coach Adonis Tierra. “Pero sinabi ni Ola na babawi siya sa finals. Pinag-uusapan pa namin kung paano makontrol si Mbala.”

Ang Game 2 ng finals ay gagawin sa Lunes, Disyembre 1 at kung kinakailangan, ang Game 3 ay gagawin kinabukasan sa Ynares Pasig pa rin.

Ang labanan para sa ikatlong puwesto na paglalabanan ng University of San Carlos at University of Visayas ay gagawin sa Lunes, alas-2 ng hapon.

“We reset the battle for third to Monday so that we can have enough time to book a flight for the two Visayan teams to come to Manila and for them to prepare for this game,” ani PCCL commissioner Joe Lipa. (James Ty III)