Taha masaya sa panalo ng Purefoods

ISANG sorpresa para sa Purefoods Star Hotdog ang impresibong laro ng back-up center na si Yousef Taha noong Linggo.

Naging bayani si Taha sa 77-74 panalo ng Hotshots kontra Meralco sa Alonte Sports Arena sa Binan, Laguna, dahil sa anim na krusyal niyang puntos sa huling dalawang minuto upang iakyat ang kanyang koponan sa ika-apat na panalo kontra sa tatlong talo.

Tinapos ni Taha ang laro na may 14 puntos at siyam na rebounds.

Dating naglaro si Taha para sa Air21, Globalport, San Miguel Beer at Ginebra bago siya lumipat sa Purefoods at naging bahagi pa nga siya ng koponang nanalo ng Grand Slam noong huling season.

Bago siya naglaro sa PBA ay isang taon lang naglaro si Taha sa Mapua Cardinals sa NCAA.

Nagpasalamat si Taha kay Purefoods coach Tim Cone sa pagbibigay sa kanya ng break sa Hotshots lalo na dahil may pilay si Ian Sangalang at kagagaling lang si Marc Pingris sa paglalaro sa Gilas Pilipinas.

“I guess it’s just the timing. It’s getting close to the playoffs. We are stepping on the gas for the final push,” wika ni Taha. “I was well prepared for the game and with everything coach wanted. I always had it in me. Whatever the coach tells me, I’ll do it.”

(James Ty III)