HATAW! D'yaryo ng Bayan hatawtabloid.com
TINALO ng dating kampeong De La Salle ang Adamson University, 25-23, 24-26, 25-14, 25-17, upang maiposte ang una nitong panalo sa UAAP Season 77 women’s volleyball tournament noong Linggo sa The Arena sa San Juan.
Nagtala si dating Most Valuable Player Ara Galang ng 27 puntos mula sa 14 na supalpal at walong digs upang pangunahan ang Lady Spikers sa panalo kahit wala na ang kanilang mga dating pambatong sina Michelle Gumabao at Abby Marano.
“Maganda ang ipinakita ng Adamson, medyo nagulat nga kami. Ibang-iba ang galaw nila compared sa Unigames,” wika ni La Salle coach Ramil de Jesus. “Kahit down kami, kumakapit lang.”
Sa isa pang laro noong Linggo, pinataob ng Far Eastern University ang University of the Philippines, 25-14, 26-24, 25-20, sa pangunguna ng 15 puntos ni Bernadette Pons.
Noong Sabado sa Mall of Asia Arena sa Pasay, minasaker ng University of Santo Tomas ang University of the East, 25-11, 25-12, 25-14 sa pangunguna ng rookie na si EJ Laure samantalang humataw si Alyssa Valdez ng 25 puntos sa 25-21, 25-18, 25-15 panalo ng defending champion Ateneo de Manila kontra National University.
(James Ty III)
