Grae Fernandez, bagito pa sa panliligaw!

marAMINADO si Grae Fernandez, binatilyong anak ni Mark Anthony Fernandez, na sa edad ni-yang trese ay hindi pa siya nakapanliligaw. Ayon sa bagets, gusto niya muna kasing mag-enjoy lang sa kanyang career at sa pagiging teenager.

Si Grae ay isa sa miyembro ng grupong Gimme 5 na kinabibilangan nina Joaquin Reyes, John Bermundo, Brace Arquiza, at ng teenstar na si Nash Aguas. Gumaganap siya sa TV series na Bagito, bilang kabarkada ng bida rito na si Nash.

“Ako po si Carlo dito sa Bagito, ang role ko po rito, ako ang pinaka-vain sa lahat sa grupo namin,” saad niya.

Totoo ba na hindi mo pa nasusubukang manligaw? ”Hindi pa po e, kasi ang gusto po ng Dad ko ay maging bata muna raw po ako. Siguro ‘pag 15 or 16 na po ako.

“Gusto niya ay to have fun and to enjoy your life while you have it. Parang iyong sa Bagito rin po,” nakangiting paliwanag pa ni Grae.

So, real life bagito ka talaga na parang iyong character ni Nash dito? “Opo, bagito pa po talaga ko,” matipid na sagot pa niya.

Pero, ayaw daw ni Grae ng matulad sa karakter ni Nash dito sa Bagito na sa edad na fourteen ay nakabuntis na. “Ay hindi po! Siyempre po ay ayaw kong mangyari iyon sa akin,” mabilis na reaction ni Grae.

“Dahil ang gusto ko po ay mag-enjoy muna with my career at sa school po. Iyon po ang priorities ko,” dagdag pa niya.

Ayon pa sa binatilyo, kinikilala niya ang tatak ng kanyang ama bilang isa sa Guwapings (with Jomari Yllana and Eric Fructuoso) na naging sikat na sikat din, pero gusto niya raw gumawa ng sarili niyang pangalan, lalo’t may grupo rin siya.

Ano’ng aral ang mapupulot ng viewers dito sa TV series ninyo? ”Ang Bagito po kasi, kuwento ito ng isang pagkakamali. Dahil doon, it could ruin your whole life. So dapat, just enjoy your life and don’t think about the future that much. But think about your decisions very wisely,” aniya.

Dagdag pa ng binatilyo, “Dapat din po na mag-ingat ang mga kabataan sa peer pressure, sa pre-marital sex… Actually, kids need to be actually aware para mas malaman nila at para mas ma-understand nila. So that they’ll know how to handle that kind of situations.”

Ang Bagito ay napapanood sa ABS CBN bago mag-TV Patrol.Tampok din dito sina Alexa Ilacad,Ella Cruz, Agot Isidro, Ariel Rivera, Angel Aquino, at iba pa. Ito’y mula sa direksiyon nina Onat Diaz at Jojo Saguin.
ni Nonie V. Nicasio