HATAW! D'yaryo ng Bayan hatawtabloid.com
Maselan ang tema ng latest project ng Dreamscape Entertainment para sa teleseryeng “Bagito” na tumatalakay sa batang ama na ginagampanan ni Nash Aguas kasama ang kalabtim na si Alexa Ilacad. Pero nagtagumpay ang production na pinamumunuan ni Sir Deo Edrinal dahil simula nang ipalabas ito noong Lunes ay consistent ang serye sa mataas nitong ratings.
Sobrang relate kasi ang young generation sa show specially sa mga bagets na tulad ng character na ginagampanan ni Nash, na sa murang edad ay nakabuntis nang maaga. At para rin sa buong pamilya ang nasabing serye kung saan ipinapakita rito ang relasyon ng magulang sa anak. Bukod kina Nash at Alexa agaw-eksena rin dito si Ella Cruz na tagumpay sa unang attempt sa pagganap ng daring role bilang si Vanessa ang babaeng nadisgraya ni Drew (Nash). Hindi raw halos makapaniwala ang dalaga na makakayanan niyang gawin ang bed scene nila ng bidang si Nash.
“Grabe! Hindi ko talaga akalain na makagagawa ako nang ganito. Ito na talaga ‘yung isa sa pinaka-challenging role na ginawa ko sa buhay ko. Kaya ibinigay ko na rin talaga ang best ko,” nakatawang bungad ni Ella. “Medyo na-shock lang kasi ako dahil paulit-ulit talaga siyang ipinapakita kasi may flashback pa. I don’t know talaga how to react, hindi ako sanay,” dagdag ng Kapamilya youngstar.
Sa tanong kung paano siya nakumbinsi ng Dreamscape na tanggapin ang role ay narito ang tugon ni Ella. “Eighteen din naman si Vanessa (karakter na pino-portray sa Bagito) kaya ko siya kinuha dahil sa karakter niya mismo. Sobrang challenging niya po kasi. Binalewala ko lahat, alam nating for sure, may masasabi at masasabi sila, pero I’m just being professional po,” paliwanag ng petite actress. Ano naman kaya ang naramdaman ng dalaga nang gawin ang maseselang eksena sa serye? “Sobrang kabado po naming parehas. Sabi ko, ‘ah, 18 na talaga ako.’ Si-nabi naman po nila sa akin na may eksena at alam ko na darating din naman sa punto na gagawa ako ng gano’ng eksena. Sabihin na natin na medyo napaaga lang, saka maganda naman po talaga ‘yung show e. ‘Yon ang inisip ko, ang ganda ng character ni Vanessa para i-let go ko ‘yung show e,” diin ng aktres na super sexy nang mag-attend sa special screening ng Bagito last week sa 14th floor ng ELJ Bldg.
Diretso lang ang pagtutok gabi-gabi sa Bagito bago mag-TV Patrol sa Primetime Bida ng Kapamilya network. Bawat episode ay hindi lang kayo ma-i-excite sa inyong panonood kundi kapupulutan pa ng aral.
Korek! Ang Bagito, ang teleseryeng worth watching gyud!
ni Peter Ledesma
