HATAW! D'yaryo ng Bayan hatawtabloid.com
MAGSISIMULA na sa Sabado, Nobyembre 22, ang men’s at women’s volleyball ng UAAP Season 77 sa Mall of Asia Arena sa Pasay City.
Sa men’s division, maglalaban ang defending champion National University at Adamson simula alas-otso ng umaga at susundan ito ng bakbakang Ateneo de Manila at Far Eastern University sa alas-10.
Kagagaling lang ng Tamaraws sa pagkopo ng ikatlong puwesto sa Shakey’s V League men’s division.
Pagkatapos ng opening ceremonies sa alas-1:45 ng hapon, papalo na ang women’s division kung saan maghaharap ang University of the East at University of Santo Tomas sa alas-2 ng hapon at ang defending champion Ateneo kalaban ang National U sa alas-4.
Sasandalan ni Lady Eagles coach Tai Bundit sina Alyssa Valdez at Denden Lazaro habang si Jaja Santiago ay ibabandera ng Lady Bulldogs.
“Tickets for the opening are fast selling out,” wika ni UAAP secretary-treasurer Rodrigo Roque kahapon sa PSA Forum sa Shakey’s Malate. “Volleyball is fast becoming as popular as basketball but we’re hoping that it’s not just a fad.”
Sa Linggo, Nobyembre 23, maglalaban sa men’s division ang La Salle kontra UP at UST kontra UE samantalang sa women’s division ay maghaharap ang FEU kalaban ang UP at La Salle kalaban naman ang Adamson sa The Arena sa San Juan.
Bukod sa volleyball, ang iba pang mga palaro sa second semester ng UAAP ay ang juniors basketball, football, fencing, athletics, chess, lawn tennis at softball.
(James Ty III)
