Rayver, isasama sa Two Wives

 

KASAMA pala si Rayver Cruz sa Two Wives nina Kaye Abad, Erich Gonzales, at Jason Abalos na umeere gabi-gabi bago ang Koreanovelang Angel Eyes.

Lumabas na raw si Rayver noong nakaraang linggo sabi ng kasama namin sa bahay pero sandali lang kaya hindi rin alam kung ano ang papel ng aktor.

Mabuti naman at binigyan na ng TV project si Rayver dahil sayang naman ang galing niya sa pag-arte kung ibuburo lang.

Tanda namin minsan nang nakatsikahan namin ang bossing ng isang malayong network na minsan daw ay hindi lang puro hitsura at kabaitan ang taglay ng isang artista para bigyan ng projects, dapat marunong umarte at may appeal din sa manonood.

Tama naman, pero sa kaso ni Rayver, malakas ang appeal. Katunayan, parati siyang nire-request sa TFC shows dahil nga gustong-gusto nilang sumayaw at guwapo ang aktor at dagdag bonus na magaling umarte at matangkad.

Hindi namin napapanood ang Two Wives kasi parang walang bago sa kuwento ng Legal Wife na nag-aagawan sa isang lalaki at pareho rin ng eksena, nag-aaway ang dalawang babae, kaloka.

Sana maganda ang papel ni Rayver at hindi lang dekorasyon at higit sa lahat, hindi siya nega sa paningin ng viewers.

 

ni Reggee Bonoan