Lovi, magtutungo ng Japan para kumain ng sashimi

NAGBABALIK muli sa paggawa ng horror films si Lovi Poe via Flight 666 ng Shake, Rattle & Roll XV ng Regal Films. Bale ito ang ikatatlong beses na paggawa ni Lovi ng SRR na idinirehe ni Perci Intalan.

Aminado si Lovi na nakadama siya ng takot at nerbiyos habang ginagawa ang kanilang eksena sa eroplano. Kasi naman, ‘yung halimaw na ginamit sa movie ay kakila-kilabot ang hitsura kaya mapapasigaw ka talaga kapag umatake na ito.

“Hindi ko kayang tingnan! Napapapikit ako kapag sumalakay. Nahilo talaga ako sa kasisigaw at kakatakbo. Although alam kong props lang ‘yon, still ‘yun na yata ang creature na talagang nagpasigaw sa akin. Marami na akong nagawang horror films at iba-ibang creatures ang nakalaban ko, pero itong ‘Flight 666’, ewan ko nakakabaliw,” sambit ni Lovi na kapareha for the first time si Matteo Guidicelli.

Ayon naman sa Regal Matriarch na si Mother Lily Monteverde, ito ang pinakamahal niyang SRR dahil talagang umarkila siya ng eroplano para sa Flight 666 episode. “For the first time in my life, I spend too much for this film alone.”

Sinabi pa ni Mother Lily na, “Both three episodes ay nakakatakot. I couldn’t sleep after watching it.” At in fairness sa teaser na aming napanood, mukhang maganda at nakatatakot nga ang mga episode ng SRR XV na bukod sa Flight 666 ay kasama rin ang Ahas ni Dondon Santos at pinagbibidahan ni Erich Gonzales, at ang Ulam ni Carla Abellana at idinirehe ni Jerrold Tarog.

Samantala, naikuwento ni Lovi na next week ay magtutungo sila ng kanyang ina sa Japan para magbakasyon o ang tinatawag niyang Me Time (with my mom). Hindi raw makakasama ang kanyang BF (na seven months na pala ang kanilang relasyon) na si Rocco Nacino dahil busy ito sa taping.

Ani Lovi, magtutungo siya ng Japan dahil, “para kumain ng sashimi,” natatawang sagot nito.

Paano’y noong unang makatungtong pala ng Japan si Lovi ay ni hindi niya nagawa iyon (ang kumain ng sashimi) dahil work ang ginawa niya roon bukod pa sa isang araw lamang sila sa Japan.

“Overnight lang ako dahil for work lang ang ipinunta ko. Hindi ko talaga na-enjoy. Kaya sabi ko kakain talaga ako ng sashimi at ramen this time, mga ganoon. Magpalamig din ng isip, mag-recharge siyempre,” anang pa ng dalaga na lalong gumaganda dahil inlove.

Mapapanood ang SRR XV sa December 25 at isa sa entry ng Metro Manila Film Festival.
ni Maricris Valdez Nicasio