Amang sumunog sa anak, nagbigti

NAGBIGTI ang suspek sa tangkang pagsunog sa kanyang 11-anyos anak na babae sa Manila South Cemetery nitong Martes.

Kinompirma ni Dr. Jess Sison, Director ng Santa Ana Hospital, hindi na umabot nang buhay sa kanilang pagamutan ang 39-anyos suspek na si Emmanuel Santos.

Isinugod si Santos sa ospital ng mga kawani ng sementeryo nang makitang nakabigti sa isang musoleo, pasado 8 a.m. kahapon.

Matatandaan, mahimbing na natutulog ang bata sa ibabaw ng nitso Martes ng gabi nang buhusan siya ng kanyang ama ng thinner at saka sinilaban.

Matagal nang hiwalay ang ina ng bata mula sa suspek na tagalinis sa sementeryo at kilalang nagdodroga.

Samantala, inilabas na kahapon ng kanyang ina ang biktima sa Ospital ng Makati.

Sinagot ng lokal na pamahalaan ng Makati ang gastusin ng batang dumanas ng 2nd degree burn.