US citizen nagbaril sa burol ni misis (Natakot sa pag-iisa)

VIGAN CITY – Sa mismong burol ng kanyang misis, nagbaril sa sarili ang isang retired employee mula sa Estados Unidos, sa Brgy. Cagayungan, Narvacan, Ilocos Sur kamakalawa.

Itinutok ni Crisanto Cabanting Sr., 78, ang kalibre .45 baril sa kanyang dibdib at pinaputok ito.

Nangyari ang insidente kamakalawa ng gabi sa burol ng kanyang misis na ikinabulabog ng lahat ng mga nakikiramay.

Sa inisyal na imbestigasyon ng Narvacan municipal police station, labis na ikinalungkot ni Cabanting ang pagpanaw ng asawang si Antonia.

Sinabi ng biktima na wala nang silbi ang kanyang buhay dahil wala na ang kabiyak na mag-aalaga sa kanya.

Sinubukang kausapin at pakalmahin ng mga kamag-anak ang biktima ngunit hindi nakinig.

Naitakbo sa ospital si Crisanto ngunit idineklara ng mga doktor na dead on arrival.

Una rito, sinabi ng biktima na kapag namatay ang kanyang asawa ay susunod din siya dahil wala na siyang kaagapay sa buhay.