Quarters ng PSSBC lalarga na

KOMPLETO na ang mga paaralang lalaban sa quarterfinals ng Philippine Secondary Schools Basketball Championship (PSSBC) na gagawin bukas sa Chiang Kai Shek Gym sa Binondo, Maynila.

Maghaharap sa unang laro sa alas-12 ng tanghali ang Chiang Kai Shek at ang Xavier School samantalang maglalaban sa alas-1:30 ng happon ang FEU-FERN at Hope Christian High School.

Sa alas-tres ay magtutunggali ang National University at Mapua-Malayan samantalang sa alas-3:30 ng hapon naman ay magbabanggaan ang Jose Rizal University ang San Beda College.

Sa pagtatapos ng eliminations noong Miyerkoles sa SGS Gym sa Quezon City ay minasaker ng Chiang Kai Shek ang San Sebastian, 106-87, pagkatapos na lumamang ang Blue Dragons, 87-53, sa ikatlong quarter.

Pinatumba ng FEU ang JRU, 75-67, sa overtime habang pinabagsak ng Mapua ang Xavier, 61-51 at pinulbos ng Hope Christian ang UP Integrated School, 91-74.

Gagawin ang semifinals kinabukasan at ang finals naman ay sa Nobyembre 22 sa CKSC Gym uli.

Mapapanood ang mga laro ng PSSBC sa Aksyon TV 41. (James Ty III)