Nanay tumalon sa creek, tigok (Natakot magutom ang limang anak)

BUNSOD ng problema kung paano pakakainin ang limang mga anak, nagpasyang tumalon sa isang creek ang isang 29-anyos ginang kamakalawa ng hapon sa Binondo, Maynila.

Kinilala ni SPO2 Jonathan Bautista ang biktimang si Cyra Jacob, may live-in partner, at nakatira sa 565 Valderama St., Delpan, Binondo, Maynila, wala nang buhay nang maiahon sa nasabing creek.

Ayon sa pulisya, dakong 3 p.m. makaraan paliguan ang kanyang mga anak ay biglang tumakbo ang biktima at tumalon sa creek ng Reina Regente sa Bindono.

Nabatid sa mga kapatid ng biktima, bata pa lamang ay may suicidal tendency na ang biktima.

Minsan na anilang naglaslas ng pulso ang biktima nang tutulan ng kanyang ina ang pakikipagrelasyon sa nobyo.

Inihayag ng kapatid ng biktima na si Cesar, pinoproblema ng biktima kung paano pakakainin ang mga anak dahil namumulot lamang siya ng kalakal kasama ang kanyang kinakasama.

Leonard Basilio