Romnick, Boy isama sa panalangin

Isang insidente na naman ang nangyari sa huling karera nitong nagdaang Martes sa pista ng Sta. Ana Park na kung saan ay nadapa ang kabayong si Markus Wolf na pinatnubayan ni apprentice rider Romnick Bolivar. Ang pangyayaring iyan ay nangyari sa loob na mismo ng huling 100 metro ng laban na kung saan ay may mga tatlong kabayong layo sa unahan si Markus Wolf sa mga kasunod niya, iyon nga lang sa hindi inaasahang pangyayari ay biglaang natisod si kabayo at umikot kasama si Romnick.

Ayon sa impormasyon mula sa facebook account ni Romnick ay tanging ang kanang paa lamang niya ang nagkaroon ng bali, kaya inantabayan pa ang resulta kung semento o bakal ang ikakabit pansamantala sa napinsalang buto.

Sa lagay naman ng isa pang bago at batang hinete na si Leonardo “Boy” Cuadra Jr. ay dalawang beses na siyang naoperahan at walang anuman sa katawan ang napinsala, iyon nga lang ay tulog at walang-malay pa si Boy sanhi daw ng gamot ayon sa Malvar Hospital na pinagdalhan sa kanya. Kaya sa pagkakataong ito ay hangad ko ang inyong mga panalangin para kina Romnick at Boy, para sa kanilang kaligtasan at dagliang paggaling.

ni Fred L. Magno