Mga panalo, tampok sa GRR TNT

USAPANG panalo ang tampok ngayong Sabado sa lifestyle show ng GMA News TV na Gandang Ricky Reyes Toh (GRR TNT), 9:00-10:00 a.m. at produksiyon ng ScriptoVision.

Dahil semestral break na, irerekomenda ni Mader Ricky ang isang resort sa Antipolo na isang oras lang ang biyahe mula Maynila. Ayon sa beauty guru, “Maganda ang tanawin doon dahil makikita mo ang Metro Manila at Laguna de Bay. Masarap mag-bonding dito ang mga bakasyonistang estudyante kasama ang pamilya at mga kaibigan.”

Panahon na rin para lunasan ang pagnipis at pagkalugas ng buhok na nakakawala ng kompiyansa ‘di lang sa mga nagkakaedad kundi pati sa mga kabataan. Ipakikita ng dalubhasang hairdresser ng Gandang Ricky Reyes Salon kung paano kayo lalagyan ng “human hair wig” para malunasan ang inyong problema at magkaroon kayo ng feeling ng isang winner dahil mababalik ang inyong self confidence.

Kilala na ang mga Pinoy sa kantahan. Kamakaila’y naidagdag sa listahan ng mga kampeon si Morlissa Punzalan na ang mga magulang ay tubong Bataan. Si Morlissa ang nagwagi sa X Factor-Australia. Panauhin din sa show ang mga kababayang nagwagi sa WCOPA Koreaoke na maglalahad ng pinagdaanang karanasan para magapi ang mga kalabang mula sa iba-ibang bansa.

Sa larangan ng basketball ay usap-usapan ang pagwawagi ng koponan ng National University sa UAAP. Gumawa rin ng pangalan sa “water ski” ang estudyante ng NU na BJ On Ang.

Wow wagi! Ang galing ng Pinoy! Mabuhay ang Pinoy!