Tanduay handang tibagin ang Hapee

SISIKAPIN ng Tanduay Light na alisin ang kinang ng Hapee Fresh Fighters sa kanilang duwelo sa 2014-15 PBA D-League Aspirants cup mamayang 4 pm sa Ynares Arena sa Pasig City.

Ikalawang sunod na panalo rin ang pakay ng Cagayan Valley Rising Suns at Cafe France kontra magkahiwalay na kalaban. Makakasagupa ng Rising Suns ang Breadstory-Lyceum sa ganap na 12 ng tanghali at makakaharap ng Bakers ang Racal Motor Sales Corp. sa ganap na 2 pm.

Ang Hapee ang siyang kumuha sa prangkisa ng multi-titled NLEX. Hawak ni coach Ronnie Magsanoc, ang Fresh Fighters ay kinabibilangan ng mga manlalaro buhat sa San Beda at Ateneo.

Bukod dito ay sumasandig din si Magsanoc kina two-time UAAP Most Valuable Player Bobby Ray Parks, NCAA MVP Earl Scottie Thompson, Troy Rosario ng NU at Arnold Van Opstal ng La Salle.

Noong Lunes ay dinaig ng Hapee ang AMA University Titans, 69-61 at naungusan naman ng Tanduay Light ang MJM M-Builders, 78-77.

Hawak ni coach Lawrence Chongson, ang Tanduay Light ay nakakuha ng 16 puntos buhat kay Roi Sumang laban sa MJM M-Builders. Siya ay sinuportahan nina Leo de Vera na nagdagdag ng 13 at Jaypee Belencion na gumawa ng 10.

Ang Cagayan Valley ay nagwagi kontra sa MJM M-Builders, 94-86 samantalang tinambakan ng Cafe France ang MP Hotel Warriors.

Natalo naman ang Racal Motors sa Cebuana Lhuillier, 89-70 samantalang nabigo ang Breadstory-Lyceum sa nangungunang Jumbo Plastic Linoleum, 79-72.

 

ni Sabrina Pascua