HATAW! D'yaryo ng Bayan hatawtabloid.com
KOMPIYANSA ang Magdalo party-list na makatitikim ng umento sa subsistence allowance ang uniformed personnel ng gobyerno sa susunod na taon.
Nasisiguro nina Magdalo Reps. Ashley Acedillo at Gary Alejano, mapagtitibay ng Kamara sa pagbabalik ng sesyon ang kanilang House Joint Resolution No. 11.
Sa ilalim ng joint resolution, itataas sa P150 kada araw ang subsistence allowance ng uniformed personnel mula sa kasalukuyang P90 bawat araw.
Sakop nito ang mga taga Armed Forces of the Philippines (AFP), kasama ang civilian active auxiliaries nito, ang Philippine Coast Guard (PCG), Philippine National Police (PNP), Bureau of Fire Protection (BFP), Bureau of Jail Management and Penology (BJMP) at Philippine National Police Academy (PNPA).
Ang HJR 11 ay aprobado na ng House committee on appropriations para sa alokasyon ng pondo para rito at maghihintay na lamang matalakay sa plenaryo, habang ang counterpart nito sa Senado ay pasado na.
Sa komento ng DBM sa Senate version nito, nais ng kagawaran na sa Enero 2015 maging epektibo ang umento sa subsistence allowance ngunit sa House version, nais nina Acedillo at Alejano na maging retroactive ito sa Enero 2014.
